image01

image01

image01

    Welcome to Carmelite Monastery, Margao, Goa     

Konkani Language

Lhan Fulachi Lhan Vatt
--John M. Alfonso Karmelit


Otubrache 1ler Povitr Sobha Ballka Jezuchea Sant Terezachi porob somarombhta. Hea santinnik Jezuchem lhan ful mhunnon vollkhotat. Hi Karmelit santinn jivitachea 24 vorsancher somploli ani Povitr Sobhent 33vi Povitr Sobhechi Dhormxastrinn (Doctor of the Church) zali. 1997 vorsa Otubrache 19ver, atanchea Sant Juanv Paulu II rean ( ten'nache Pap Saib) tika Povitr Sobhechi Dotor mhunn porogttloli ten'na ti soglleam von lhan Povitr Sobhechi Dotor zal'li. Tika, Sant Francis Xaviera vangdda misanvanchi askarinn mhunn vollkhotat. Tichem, 'Eka Otmeachi Kotha' (Story of a Soul) hem pustok khup nanvlovkik zalam. Toxench tinnem chitti (don khondd),kovita, magnnim ani atth nattkulim boroileat.

Kristachi pattlavdar koxi tinnem apnnailoli protima (image) Sant Terezachi lhan vatt. Kristacho pattlavdar disa-dispott'tti ani sadea jivitantlean bhagevontponn zoddunk sodta, hem ti monapasun mantali. Ek dharmik (religious) koxi tichea monant don mud'de riglolem ani te mhollear, Kaklut ani bhogsonneantlean Dev aplo mog dakoita ani Devacho pattlav korpant apunn sompurnn nhoi. Tichea mogachea potik (Jezuk) ticho mog dakhounk 'fulam' hi khunna tinnem apnnailoli. Disa-dispott'ttiche lhan tyag ani vavr gulabachio pakllio koxio Jezuchea payam fuddeant dovortali.

Karmelit bhitorlea Madrinchea motthant bhitor sorpachem apovnnem asun, pondravo zolm dis monoun chear mhoineamni karmelit motthant bhitor sorlolie hie santinnin Devache kheastiche vo zoddttechie bhirantin (fear of God's judgement) jiyetoleam sovem husko dakhoilo. Aplem jivit jiyevpantlean, Dev- kaklut ani mog mhunn ti zannam asli. Devachem bhurgem koxem jiyetolean Devachie bhirantint koxem jiyeum yeta?" ho prosn Sant Terez kortali. Apunn sompurnn nhoi, hemvui ti zannam asli. Dekhunuch, zoxem ek bhurgem aplea avoy-bapayam kodden uktea hatamni ani khol visvasan veta toxem ti Devak mellunk vetali.

Ti dil'lea vavrak sodanch visvaxi ravli. Dispott'ttea jivitant mellttoleank sodanch borem utor ditali. Hich tachi lhan ani sadi vatt. Tinnem Lisieux-achea motthant kel'lea vavrantlean Deva ani sangati jiyetoleam sovem aplo mog ukto kelo. Sangati jiyeunk tras poddttoleam sovem pasun tinnem toch husko ani mog dakhoilo. Tichem jivit khup sadem, soroll, punn dhoir'yadik (fortitude) ani bandilkichem (commitment).

Tika, Povitr Sobhechi Dhormxastrinn mhunn Sant Juanv Paulu IIrean porogottloli ten'na, tannem tichea atmik jivitachi tokhnnay korun dharmik jivitant tinnem samball'llolea poripokv (matured) jivitacho ul'lekh kel'lo. Tichea borovpantlean distolo khol bhavarth polleun Povitr Sobhent aslolea mhan atmik zannkaram modem tika zago favo mhunn tannim sanglolem.

Aiz tichea sadeponnachie ani lhan vattek sabar zannam lagim zaleat. Ti motthachea chear vonttim bhitor jiyeli. Punn tichi odheatmiktay (spirituality) zaitea zannank lagim oddtta. Amchea Bharotant ani sonvsarant Karmelit Bhitorlea Motthantlio madri hi tichi lhan vatt jiyetat ani porgott'ttat. Amkam dor ekleak ti bhagevont zaunk apoita. Dor ek dis amkam Devachench dennem mhunn manun gheun lhan lhan ani sadio kornnio korun Devachea mogak sakxi diun amchea jivitantlean ami bhagevontponn zoddum yeta, mhunn ti amkam xikoita.

       

 

 

O U R   T E A M


Fr. Archibald Gonsalves


Fr. Michael M. Shenoy


Fr. Jossey Rodrigues


Fr. Mark Furtado


Fr. Noel D'Cunha


Fr. Joseph D'Souza


Br. Malvino


Br. Maurice Fonseca